תהלים פרק קכח 
============= 
(א) שִׁיר הַמַּעֲלוֹת אַשְׁרֵי כָּל יְרֵא יְקֹוָק הַהֹלֵךְ בִּדְרָכָיו: 
(ב) יְגִיעַ כַּפֶּיךָ כִּי תֹאכֵל אַשְׁרֶיךָ וְטוֹב לָךְ: 
(ג) אֶשְׁתְּךָ כְּגֶפֶן פֹּרִיָּה בְּיַרְכְּתֵי בֵיתֶךָ בָּנֶיךָ כִּשְׁתִלֵי זֵיתִים סָבִיב לְשֻׁלְחָנֶךָ: 
(ד) הִנֵּה כִי כֵן יְבֹרַךְ גָּבֶר יְרֵא יְקֹוָק: 
(ה) יְבָרֶכְךָ יְקֹוָק מִצִּיּוֹן וּרְאֵה בְּטוּב יְרוּשָׁלִָם כֹּל יְמֵי חַיֶּיךָ: 
(ו) וּרְאֵה בָנִים לְבָנֶיךָ שָׁלוֹם עַל יִשְׂרָאֵל: 

 *   *   *   *   *   *   *   *   *   *   *   *   *   *