תהלים פרק קמ 
============ 
(א) לַמְנַצֵּחַ מִזְמוֹר לְדָוִד: 
(ב) חַלְּצֵנִי יְקֹוָק מֵאָדָם רָע מֵאִישׁ חֲמָסִים תִּנְצְרֵנִי: 
(ג) אֲשֶׁר חָשְׁבוּ רָעוֹת בְּלֵב כָּל יוֹם יָגוּרוּ מִלְחָמוֹת: 
(ד) שָׁנֲנוּ לְשׁוֹנָם כְּמוֹ נָחָשׁ חֲמַת עַכְשׁוּב תַּחַת שְׂפָתֵימוֹ סֶלָה: 
(ה) שָׁמְרֵנִי יְקֹוָק מִידֵי רָשָׁע מֵאִישׁ חֲמָסִים תִּנְצְרֵנִי אֲשֶׁר חָשְׁבוּ לִדְחוֹת פְּעָמָי: 
(ו) טָמְנוּ גֵאִים פַּח לִי וַחֲבָלִים פָּרְשׂוּ רֶשֶׁת לְיַד מַעְגָּל מֹקְשִׁים שָׁתוּ לִי סֶלָה: 
(ז) אָמַרְתִּי לַיקֹוָק אֵלִי אָתָּה הַאֲזִינָה יְקֹוָק קוֹל תַּחֲנוּנָי: 
(ח) יְקֹוִק אֲדֹנָי עֹז יְשׁוּעָתִי סַכֹּתָה לְרֹאשִׁי בְּיוֹם נָשֶׁק: 
(ט) אַל תִּתֵּן יְקֹוָק מַאֲוַיֵּי רָשָׁע זְמָמוֹ אַל תָּפֵק יָרוּמוּ סֶלָה: 
(י) רֹאשׁ מְסִבָּי עֲמַל שְׂפָתֵימוֹ <יכסומו> יְכַסֵּמוֹ: 
(יא) <ימיטו> יִמּוֹטוּ עֲלֵיהֶם גֶּחָלִים בָּאֵשׁ יַפִּלֵם בְּמַהֲמֹרוֹת בַּל יָקוּמוּ: 
(יב) אִישׁ לָשׁוֹן בַּל יִכּוֹן בָּאָרֶץ אִישׁ חָמָס רָע יְצוּדֶנּוּ לְמַדְחֵפֹת: 
(יג) <ידעת> יָדַעְתִּי כִּי יַעֲשֶׂה יְקֹוָק דִּין עָנִי מִשְׁפַּט אֶבְיֹנִים: 
(יד) אַךְ צַדִּיקִים יוֹדוּ לִשְׁמֶךָ יֵשְׁבוּ יְשָׁרִים אֶת פָּנֶיךָ: 

 *   *   *   *   *   *   *   *   *   *   *   *   *   *