תהלים פרק כה 
============ 
(א) לְדָוִד אֵלֶיךָ יְקֹוָק נַפְשִׁי אֶשָּׂא: 
(ב) אֱלֹהַי בְּךָ בָטַחְתִּי אַל אֵבוֹשָׁה אַל יַעַלְצוּ אֹיְבַי לִי: 
(ג) גַּם כָּל קֹוֶיךָ לֹא יֵבֹשׁוּ יֵבֹשׁוּ הַבּוֹגְדִים רֵיקָם: 
(ד) דְּרָכֶיךָ יְקֹוָק הוֹדִיעֵנִי אֹרְחוֹתֶיךָ לַמְּדֵנִי: 
(ה) הַדְרִיכֵנִי בַאֲמִתֶּךָ וְלַמְּדֵנִי כִּי אַתָּה אֱלֹהֵי יִשְׁעִי אוֹתְךָ קִוִּיתִי כָּל הַיּוֹם: 
(ו) זְכֹר רַחֲמֶיךָ יְקֹוָק וַחֲסָדֶיךָ כִּי מֵעוֹלָם הֵמָּה: 
(ז) חַטֹּאות נְעוּרַי וּפְשָׁעַי אַל תִּזְכֹּר כְּחַסְדְּךָ זְכָר לִי אַתָּה לְמַעַן טוּבְךָ יְקֹוָק: 
(ח) טוֹב וְיָשָׁר יְקֹוָק עַל כֵּן יוֹרֶה חַטָּאִים בַּדָּרֶךְ: 
(ט) יַדְרֵךְ עֲנָוִים בַּמִּשְׁפָּט וִילַמֵּד עֲנָוִים דַּרְכּוֹ: 
(י) כָּל אָרְחוֹת יְקֹוָק חֶסֶד וֶאֱמֶת לְנֹצְרֵי בְרִיתוֹ וְעֵדֹתָיו: 
(יא) לְמַעַן שִׁמְךָ יְקֹוָק וְסָלַחְתָּ לַעֲוֹנִי כִּי רַב הוּא: 
(יב) מִי זֶה הָאִישׁ יְרֵא יְקֹוָק יוֹרֶנּוּ בְּדֶרֶךְ יִבְחָר: 
(יג) נַפְשׁוֹ בְּטוֹב תָּלִין וְזַרְעוֹ יִירַשׁ אָרֶץ: 
(יד) סוֹד יְקֹוָק לִירֵאָיו וּבְרִיתוֹ לְהוֹדִיעָם: 
(טו) עֵינַי תָּמִיד אֶל יְקֹוָק כִּי הוּא יוֹצִיא מֵרֶשֶׁת רַגְלָי: 
(טז) פְּנֵה אֵלַי וְחָנֵּנִי כִּי יָחִיד וְעָנִי אָנִי: 
(יז) צָרוֹת לְבָבִי הִרְחִיבוּ מִמְּצוּקוֹתַי הוֹצִיאֵנִי: 
(יח) רְאֵה עָנְיִי וַעֲמָלִי וְשָׂא לְכָל חַטֹּאותָי: 
(יט) רְאֵה אוֹיְבַי כִּי רָבּוּ וְשִׂנְאַת חָמָס שְׂנֵאוּנִי: 
(כ) שָׁמְרָה נַפְשִׁי וְהַצִּילֵנִי אַל אֵבוֹשׁ כִּי חָסִיתִי בָךְ: 
(כא) תֹּם וָיֹשֶׁר יִצְּרוּנִי כִּי קִוִּיתִיךָ: 
(כב) פְּדֵה אֱלֹהִים אֶת יִשְׂרָאֵל מִכֹּל צָרוֹתָיו: 

 *   *   *   *   *   *   *   *   *   *   *   *   *   *