תהלים פרק לד 
============ 
(א) לְדָוִד בְּשַׁנּוֹתוֹ אֶת טַעְמוֹ לִפְנֵי אֲבִימֶלֶךְ וַיְגָרֲשֵׁהוּ וַיֵּלַךְ: 
(ב) אֲבָרֲכָה אֶת יְקֹוָק בְּכָל עֵת תָּמִיד תְּהִלָּתוֹ בְּפִי: 
(ג) בַּיקֹוָק תִּתְהַלֵּל נַפְשִׁי יִשְׁמְעוּ עֲנָוִים וְיִשְׂמָחוּ: 
(ד) גַּדְּלוּ לַיקֹוָק אִתִּי וּנְרוֹמְמָה שְׁמוֹ יַחְדָּו: 
(ה) דָּרַשְׁתִּי אֶת יְקֹוָק וְעָנָנִי וּמִכָּל מְגוּרוֹתַי הִצִּילָנִי: 
(ו) הִבִּיטוּ אֵלָיו וְנָהָרוּ וּפְנֵיהֶם אַל יֶחְפָּרוּ: 
(ז) זֶה עָנִי קָרָא וַיקֹוָק שָׁמֵעַ וּמִכָּל צָרוֹתָיו הוֹשִׁיעוֹ: 
(ח) חֹנֶה מַלְאַךְ יְקֹוָק סָבִיב לִירֵאָיו וַיְחַלְּצֵם: 
(ט) טַעֲמוּ וּרְאוּ כִּי טוֹב יְקֹוָק אַשְׁרֵי הַגֶּבֶר יֶחֱסֶה בּוֹ: 
(י) יְראוּ אֶת יְקֹוָק קְדֹשָׁיו כִּי אֵין מַחְסוֹר לִירֵאָיו: 
(יא) כְּפִירִים רָשׁוּ וְרָעֵבוּ וְדֹרְשֵׁי יְקֹוָק לֹא יַחְסְרוּ כָל טוֹב: 
(יב) לְכוּ בָנִים שִׁמְעוּ לִי יִרְאַת יְקֹוָק אֲלַמֶּדְכֶם: 
(יג) מִי הָאִישׁ הֶחָפֵץ חַיִּים אֹהֵב יָמִים לִרְאוֹת טוֹב: 
(יד) נְצֹר לְשׁוֹנְךָ מֵרָע וּשְׂפָתֶיךָ מִדַּבֵּר מִרְמָה: 
(טו) סוּר מֵרָע וַעֲשֵׂה טוֹב בַּקֵּשׁ שָׁלוֹם וְרָדְפֵהוּ: 
(טז) עֵינֵי יְקֹוָק אֶל צַדִּיקִים וְאָזְנָיו אֶל שַׁוְעָתָם: 
(יז) פְּנֵי יְקֹוָק בְּעֹשֵׂי רָע לְהַכְרִית מֵאֶרֶץ זִכְרָם: 
(יח) צָעֲקוּ וַיקֹוָק שָׁמֵעַ וּמִכָּל צָרוֹתָם הִצִּילָם: 
(יט) קָרוֹב יְקֹוָק לְנִשְׁבְּרֵי לֵב וְאֶת דַּכְּאֵי רוּחַ יוֹשִׁיעַ: 
(כ) רַבּוֹת רָעוֹת צַדִּיק וּמִכֻּלָּם יַצִּילֶנּוּ יְקֹוָק: 
(כא) שֹׁמֵר כָּל עַצְמוֹתָיו אַחַת מֵהֵנָּה לֹא נִשְׁבָּרָה: 
(כב) תְּמוֹתֵת רָשָׁע רָעָה וְשֹׂנְאֵי צַדִּיק יֶאְשָׁמוּ: 
(כג) פּוֹדֶה יְקֹוָק נֶפֶשׁ עֲבָדָיו וְלֹא יֶאְשְׁמוּ כָּל הַחֹסִים בּוֹ: 

 *   *   *   *   *   *   *   *   *   *   *   *   *   *