תהלים פרק ו 
=========== 
(א) לַמְנַצֵּחַ בִּנְגִינוֹת עַל הַשְּׁמִינִית מִזְמוֹר לְדָוִד: 
(ב) יְקֹוָק אַל בְּאַפְּךָ תוֹכִיחֵנִי וְאַל בַּחֲמָתְךָ תְיַסְּרֵנִי: 
(ג) חָנֵּנִי יְקֹוָק כִּי אֻמְלַל אָנִי רְפָאֵנִי יְקֹוָק כִּי נִבְהֲלוּ עֲצָמָי: 
(ד) וְנַפְשִׁי נִבְהֲלָה מְאֹד <ואת> וְאַתָּה יְקֹוָק עַד מָתָי: 
(ה) שׁוּבָה יְקֹוָק חַלְּצָה נַפְשִׁי הוֹשִׁיעֵנִי לְמַעַן חַסְדֶּךָ: 
(ו) כִּי אֵין בַּמָּוֶת זִכְרֶךָ בִּשְׁאוֹל מִי יוֹדֶה לָּךְ: 
(ז) יָגַעְתִּי בְּאַנְחָתִי אַשְׂחֶה בְכָל לַיְלָה מִטָּתִי בְּדִמְעָתִי עַרְשִׂי אַמְסֶה: 
(ח) עָשְׁשָׁה מִכַּעַס עֵינִי עָתְקָה בְּכָל צוֹרְרָי: 
(ט) סוּרוּ מִמֶּנִּי כָּל פֹּעֲלֵי אָוֶן כִּי שָׁמַע יְקֹוָק קוֹל בִּכְיִי: 
(י) שָׁמַע יְקֹוָק תְּחִנָּתִי יְקֹוָק תְּפִלָּתִי יִקָּח: 
(יא) יֵבֹשׁוּ וְיִבָּהֲלוּ מְאֹד כָּל אֹיְבָי יָשֻׁבוּ יֵבֹשׁוּ רָגַע: 

 *   *   *   *   *   *   *   *   *   *   *   *   *   *