תהלים פרק פד 
============ 
(א) לַמְנַצֵּחַ עַל הַגִּתִּית לִבְנֵי קֹרַח מִזְמוֹר: 
(ב) מַה יְּדִידוֹת מִשְׁכְּנוֹתֶיךָ יְקֹוָק צְבָאוֹת: 
(ג) נִכְסְפָה וְגַם כָּלְתָה נַפְשִׁי לְחַצְרוֹת יְקֹוָק לִבִּי וּבְשָׂרִי יְרַנְּנוּ אֶל אֵל חָי: 
(ד) גַּם צִפּוֹר מָצְאָה בַיִת וּדְרוֹר קֵן לָהּ אֲשֶׁר שָׁתָה אֶפְרֹחֶיהָ אֶת מִזְבְּחוֹתֶיךָ יְקֹוָק צְבָאוֹת מַלְכִּי וֵאלֹהָי: 
(ה) אַשְׁרֵי יוֹשְׁבֵי בֵיתֶךָ עוֹד יְהַלְלוּךָ סֶּלָה: 
(ו) אַשְׁרֵי אָדָם עוֹז לוֹ בָךְ מְסִלּוֹת בִּלְבָבָם: 
(ז) עֹבְרֵי בְּעֵמֶק הַבָּכָא מַעְיָן יְשִׁיתוּהוּ גַּם בְּרָכוֹת יַעְטֶה מוֹרֶה: 
(ח) יֵלְכוּ מֵחַיִל אֶל חָיִל יֵרָאֶה אֶל אֱלֹהִים בְּצִיּוֹן: 
(ט) יְקֹוָק אֱלֹהִים צְבָאוֹת שִׁמְעָה תְפִלָּתִי הַאֲזִינָה אֱלֹהֵי יַעֲקֹב סֶלָה: 
(י) מָגִנֵּנוּ רְאֵה אֱלֹהִים וְהַבֵּט פְּנֵי מְשִׁיחֶךָ: 
(יא) כִּי טוֹב יוֹם בַּחֲצֵרֶיךָ מֵאָלֶף בָּחַרְתִּי הִסְתּוֹפֵף בְּבֵית אֱלֹהַי מִדּוּר בְּאָהֳלֵי רֶשַׁע: 
(יב) כִּי שֶׁמֶשׁ וּמָגֵן יְקֹוָק אֱלֹהִים חֵן וְכָבוֹד יִתֵּן יְקֹוָק לֹא יִמְנַע טוֹב לַהֹלְכִים בְּתָמִים: 
(יג) יְקֹוָק צְבָאוֹת אַשְׁרֵי אָדָם בֹּטֵחַ בָּךְ: 

 *   *   *   *   *   *   *   *   *   *   *   *   *   *