תהלים פרק צד 
============ 
(א) אֵל נְקָמוֹת יְקֹוָק אֵל נְקָמוֹת הוֹפִיעַ: 
(ב) הִנָּשֵׂא שֹׁפֵט הָאָרֶץ הָשֵׁב גְּמוּל עַל גֵּאִים: 
(ג) עַד מָתַי רְשָׁעִים יְקֹוָק עַד מָתַי רְשָׁעִים יַעֲלֹזוּ: 
(ד) יַבִּיעוּ יְדַבְּרוּ עָתָק יִתְאַמְּרוּ כָּל פֹּעֲלֵי אָוֶן: 
(ה) עַמְּךָ יְקֹוָק יְדַכְּאוּ וְנַחֲלָתְךָ יְעַנּוּ: 
(ו) אַלְמָנָה וְגֵר יַהֲרֹגוּ וִיתוֹמִים יְרַצֵּחוּ: 
(ז) וַיֹּאמְרוּ לֹא יִרְאֶה יָּהּ וְלֹא יָבִין אֱלֹהֵי יַעֲקֹב: 
(ח) בִּינוּ בֹּעֲרִים בָּעָם וּכְסִילִים מָתַי תַּשְׂכִּילוּ: 
(ט) הֲנֹטַע אֹזֶן הֲלֹא יִשְׁמָע אִם יֹצֵר עַיִן הֲלֹא יַבִּיט: 
(י) הֲיֹסֵר גּוֹיִם הֲלֹא יוֹכִיחַ הַמְלַמֵּד אָדָם דָּעַת: 
(יא) יְקֹוָק יֹדֵעַ מַחְשְׁבוֹת אָדָם כִּי הֵמָּה הָבֶל: 
(יב) אַשְׁרֵי הַגֶּבֶר אֲשֶׁר תְּיַסְּרֶנּוּ יָּהּ וּמִתּוֹרָתְךָ תְלַמְּדֶנּוּ: 
(יג) לְהַשְׁקִיט לוֹ מִימֵי רָע עַד יִכָּרֶה לָרָשָׁע שָׁחַת: 
(יד) כִּי לֹא יִטֹּשׁ יְקֹוָק עַמּוֹ וְנַחֲלָתוֹ לֹא יַעֲזֹב: 
(טו) כִּי עַד צֶדֶק יָשׁוּב מִשְׁפָּט וְאַחֲרָיו כָּל יִשְׁרֵי לֵב: 
(טז) מִי יָקוּם לִי עִם מְרֵעִים מִי יִתְיַצֵּב לִי עִם פֹּעֲלֵי אָוֶן: 
(יז) לוּלֵי יְקֹוָק עֶזְרָתָה לִּי כִּמְעַט שָׁכְנָה דוּמָה נַפְשִׁי: 
(יח) אִם אָמַרְתִּי מָטָה רַגְלִי חַסְדְּךָ יְקֹוָק יִסְעָדֵנִי: 
(יט) בְּרֹב שַׂרְעַפַּי בְּקִרְבִּי תַּנְחוּמֶיךָ יְשַׁעַשְׁעוּ נַפְשִׁי: 
(כ) הַיְחָבְרְךָ כִּסֵּא הַוּוֹת יֹצֵר עָמָל עֲלֵי חֹק: 
(כא) יָגוֹדּוּ עַל נֶפֶשׁ צַדִּיק וְדָם נָקִי יַרְשִׁיעוּ: 
(כב) וַיְהִי יְקֹוָק לִי לְמִשְׂגָּב וֵאלֹהַי לְצוּר מַחְסִי: 
(כג) וַיָּשֶׁב עֲלֵיהֶם אֶת אוֹנָם וּבְרָעָתָם יַצְמִיתֵם יַצְמִיתֵם יְקֹוָק אֱלֹהֵינוּ: 

 *   *   *   *   *   *   *   *   *   *   *   *   *   *