תהלים פרק צו 
============ 
(א) שִׁירוּ לַיקֹוָק שִׁיר חָדָשׁ שִׁירוּ לַיקֹוָק כָּל הָאָרֶץ: 
(ב) שִׁירוּ לַיקֹוָק בָּרֲכוּ שְׁמוֹ בַּשְּׂרוּ מִיּוֹם לְיוֹם יְשׁוּעָתוֹ: 
(ג) סַפְּרוּ בַגּוֹיִם כְּבוֹדוֹ בְּכָל הָעַמִּים נִפְלְאוֹתָיו: 
(ד) כִּי גָדוֹל יְקֹוָק וּמְהֻלָּל מְאֹד נוֹרָא הוּא עַל כָּל אֱלֹהִים: 
(ה) כִּי כָּל אֱלֹהֵי הָעַמִּים אֱלִילִים וַיקֹוָק שָׁמַיִם עָשָׂה: 
(ו) הוֹד וְהָדָר לְפָנָיו עֹז וְתִפְאֶרֶת בְּמִקְדָּשׁוֹ: 
(ז) הָבוּ לַיקֹוָק מִשְׁפְּחוֹת עַמִּים הָבוּ לַיקֹוָק כָּבוֹד וָעֹז: 
(ח) הָבוּ לַיקֹוָק כְּבוֹד שְׁמוֹ שְׂאוּ מִנְחָה וּבֹאוּ לְחַצְרוֹתָיו: 
(ט) הִשְׁתַּחֲווּ לַיקֹוָק בְּהַדְרַת קֹדֶשׁ חִילוּ מִפָּנָיו כָּל הָאָרֶץ: 
(י) אִמְרוּ בַגּוֹיִם יְקֹוָק מָלָךְ אַף תִּכּוֹן תֵּבֵל בַּל תִּמּוֹט יָדִין עַמִּים בְּמֵישָׁרִים: 
(יא) יִשְׂמְחוּ הַשָּׁמַיִם וְתָגֵל הָאָרֶץ יִרְעַם הַיָּם וּמְלֹאוֹ: 
(יב) יַעֲלֹז שָׂדַי וְכָל אֲשֶׁר בּוֹ אָז יְרַנְּנוּ כָּל עֲצֵי יָעַר: 
(יג) לִפְנֵי יְקֹוָק כִּי בָא כִּי בָא לִשְׁפֹּט הָאָרֶץ יִשְׁפֹּט תֵּבֵל בְּצֶדֶק וְעַמִּים בֶּאֱמוּנָתוֹ: 

 *   *   *   *   *   *   *   *   *   *   *   *   *   *