שמואל ב פרק כב 
============== 
(א) וַיְדַבֵּר דָּוִד לַיקֹוָק אֶת דִּבְרֵי הַשִּׁירָה הַזֹּאת בְּיוֹם הִצִּיל יְקֹוָק אֹתוֹ מִכַּף כָּל אֹיְבָיו וּמִכַּף שָׁאוּל: 
(ב) וַיֹּאמַר יְקֹוָק סַלְעִי וּמְצֻדָתִי וּמְפַלְטִי לִי: 
(ג) אֱלֹהֵי צוּרִי אֶחֱסֶה בּוֹ מָגִנִּי וְקֶרֶן יִשְׁעִי מִשְׂגַּבִּי וּמְנוּסִי מֹשִׁעִי מֵחָמָס תֹּשִׁעֵנִי: 
(ד) מְהֻלָּל אֶקְרָא יְקֹוָק וּמֵאֹיְבַי אִוָּשֵׁעַ: 
(ה) כִּי אֲפָפֻנִי מִשְׁבְּרֵי מָוֶת נַחֲלֵי בְלִיַּעַל יְבַעֲתֻנִי: 
(ו) חֶבְלֵי שְׁאוֹל סַבֻּנִי קִדְּמֻנִי מֹקְשֵׁי מָוֶת: 
(ז) בַּצַּר לִי אֶקְרָא יְקֹוָק וְאֶל אֱלֹהַי אֶקְרָא וַיִּשְׁמַע מֵהֵיכָלוֹ קוֹלִי וְשַׁוְעָתִי בְּאָזְנָיו: 
(ח) <ותגעש> וַיִּתְגָּעַשׁ וַתִּרְעַשׁ הָאָרֶץ מוֹסְדוֹת הַשָּׁמַיִם יִרְגָּזוּ וַיִּתְגָּעֲשׁוּ כִּי חָרָה לוֹ: 
(ט) עָלָה עָשָׁן בְּאַפּוֹ וְאֵשׁ מִפִּיו תֹּאכֵל גֶּחָלִים בָּעֲרוּ מִמֶּנּוּ: 
(י) וַיֵּט שָׁמַיִם וַיֵּרַד וַעֲרָפֶל תַּחַת רַגְלָיו: 
(יא) וַיִּרְכַּב עַל כְּרוּב וַיָּעֹף וַיֵּרָא עַל כַּנְפֵי רוּחַ: 
(יב) וַיָּשֶׁת חֹשֶׁךְ סְבִיבֹתָיו סֻכּוֹת חַשְׁרַת מַיִם עָבֵי שְׁחָקִים: 
(יג) מִנֹּגַהּ נֶגְדּוֹ בָּעֲרוּ גַּחֲלֵי אֵשׁ: 
(יד) יַרְעֵם מִן שָׁמַיִם יְקֹוָק וְעֶלְיוֹן יִתֵּן קוֹלוֹ: 
(טו) וַיִּשְׁלַח חִצִּים וַיְפִיצֵם בָּרָק <ויהמם> וַיָּהֹם: 
(טז) וַיֵּרָאוּ אֲפִקֵי יָם יִגָּלוּ מֹסְדוֹת תֵּבֵל בְּגַעֲרַת יְקֹוָק מִנִּשְׁמַת רוּחַ אַפּוֹ: 
(יז) יִשְׁלַח מִמָּרוֹם יִקָּחֵנִי יַמְשֵׁנִי מִמַּיִם רַבִּים: 
(יח) יַצִּילֵנִי מֵאֹיְבִי עָז מִשֹּׂנְאַי כִּי אָמְצוּ מִמֶּנִּי: 
(יט) יְקַדְּמֻנִי בְּיוֹם אֵידִי וַיְהִי יְקֹוָק מִשְׁעָן לִי: 
(כ) וַיֹּצֵא לַמֶּרְחָב אֹתִי יְחַלְּצֵנִי כִּי חָפֵץ בִּי: 
(כא) יִגְמְלֵנִי יְקֹוָק כְּצִדְקָתִי כְּבֹר יָדַי יָשִׁיב לִי: 
(כב) כִּי שָׁמַרְתִּי דַּרְכֵי יְקֹוָק וְלֹא רָשַׁעְתִּי מֵאֱלֹהָי: 
(כג) כִּי כָל <משפטו> מִשְׁפָּטָיו לְנֶגְדִּי וְחֻקֹּתָיו לֹא אָסוּר מִמֶּנָּה: 
(כד) וָאֶהְיֶה תָמִים לוֹ וָאֶשְׁתַּמְּרָה מֵעֲוֹנִי: 
(כה) וַיָּשֶׁב יְקֹוָק לִי כְּצִדְקָתִי כְּבֹרִי לְנֶגֶד עֵינָיו: 
(כו) עִם חָסִיד תִּתְחַסָּד עִם גִּבּוֹר תָּמִים תִּתַּמָּם: 
(כז) עִם נָבָר תִּתָּבָר וְעִם עִקֵּשׁ תִּתַּפָּל: 
(כח) וְאֶת עַם עָנִי תּוֹשִׁיעַ וְעֵינֶיךָ עַל רָמִים תַּשְׁפִּיל: 
(כט) כִּי אַתָּה נֵירִי יְקֹוָק וַיקֹוָק יַגִּיהַּ חָשְׁכִּי: 
(ל) כִּי בְכָה אָרוּץ גְּדוּד בֵּאלֹהַי אֲדַלֶּג שׁוּר: 
(לא) הָאֵל תָּמִים דַּרְכּוֹ אִמְרַת יְקֹוָק צְרוּפָה מָגֵן הוּא לְכֹל הַחֹסִים בּוֹ: 
(לב) כִּי מִי אֵל מִבַּלְעֲדֵי יְקֹוָק וּמִי צוּר מִבַּלְעֲדֵי אֱלֹהֵינוּ: 
(לג) הָאֵל מָעוּזִּי חָיִל וַיַּתֵּר תָּמִים <דרכו> דַּרְכִּי: 
(לד) מְשַׁוֶּה <רגליו> רַגְלַי כָּאַיָּלוֹת וְעַל בָּמוֹתַי יַעֲמִדֵנִי: 
(לה) מְלַמֵּד יָדַי לַמִּלְחָמָה וְנִחַת קֶשֶׁת נְחוּשָׁה זְרֹעֹתָי: 
(לו) וַתִּתֶּן לִי מָגֵן יִשְׁעֶךָ וַעֲנֹתְךָ תַּרְבֵּנִי: 
(לז) תַּרְחִיב צַעֲדִי תַּחְתֵּנִי וְלֹא מָעֲדוּ קַרְסֻלָּי: 
(לח) אֶרְדְּפָה אֹיְבַי וָאַשְׁמִידֵם וְלֹא אָשׁוּב עַד כַּלּוֹתָם: 
(לט) וָאֲכַלֵּם וָאֶמְחָצֵם וְלֹא יְקוּמוּן וַיִּפְּלוּ תַּחַת רַגְלָי: 
(מ) וַתַּזְרֵנִי חַיִל לַמִּלְחָמָה תַּכְרִיעַ קָמַי תַּחְתֵּנִי: 
(מא) וְאֹיְבַי תַּתָּה לִּי עֹרֶף מְשַׂנְאַי וָאַצְמִיתֵם: 
(מב) יִשְׁעוּ וְאֵין מֹשִׁיעַ אֶל יְקֹוָק וְלֹא עָנָם: 
(מג) וְאֶשְׁחָקֵם כַּעֲפַר אָרֶץ כְּטִיט חוּצוֹת אֲדִקֵּם אֶרְקָעֵם: 
(מד) וַתְּפַלְּטֵנִי מֵרִיבֵי עַמִּי תִּשְׁמְרֵנִי לְרֹאשׁ גּוֹיִם עַם לֹא יָדַעְתִּי יַעַבְדֻנִי: 
(מה) בְּנֵי נֵכָר יִתְכַּחֲשׁוּ לִי לִשְׁמוֹעַ אֹזֶן יִשָּׁמְעוּ לִי: 
(מו) בְּנֵי נֵכָר יִבֹּלוּ וְיַחְגְּרוּ מִמִּסְגְּרוֹתָם: 
(מז) חַי יְקֹוָק וּבָרוּךְ צוּרִי וְיָרֻם אֱלֹהֵי צוּר יִשְׁעִי: 
(מח) הָאֵל הַנֹּתֵן נְקָמֹת לִי וּמוֹרִיד עַמִּים תַּחְתֵּנִי: 
(מט) וּמוֹצִיאִי מֵאֹיְבָי וּמִקָּמַי תְּרוֹמְמֵנִי מֵאִישׁ חֲמָסִים תַּצִּילֵנִי: 
(נ) עַל כֵּן אוֹדְךָ יְקֹוָק בַּגּוֹיִם וּלְשִׁמְךָ אֲזַמֵּר: 
(נא) <מגדיל> מִגְדּוֹל יְשׁוּעוֹת מַלְכּוֹ וְעֹשֶׂה חֶסֶד לִמְשִׁיחוֹ לְדָוִד וּלְזַרְעוֹ עַד עוֹלָם: פ 

 *   *   *   *   *   *   *   *   *   *   *   *   *   *